"Хоноҕордооҕу "Түһүлгэ" СК республикаҕа биллэриллибит Ийэ сылын чэрчитинэн араас өрүттээх тэрээһиннэри ыытар. Ол курдук, муус устар 16 күнүгэр "Ийэҕэ үрдүк махтал!" истиҥ иһирэх киэһэ ыытылынна. Бу дьоро күн Суотту нэһилиэгин баһылыга Василий Иннокентьевич Иванов үөрүүлээх быһыыга-майгыга САССР 100 сыллаах үбүлүөйүн көрсө  тахсыбыт анал бэлиэни "Илгэ" фольклорнай ансаамбыл бэтэрээннэригэр  туттарда. "Түһүлгэ" СК иһинэн үлэлиир "Тэтим" үҥкүү ансаамбыла, нэһилиэкпит кэрэ куоластаах ырыаһыттара, көрдөөх-нардаах сыанкалар, фольклорнай нүөмэрдэр дохсун ытыс тыаһынан доҕуһуолланнылар.
Сыанаҕа 35 сылларын ыллыыр-туойар Улуу Кытай Пекин куоратыгар ыытыллыбыт "Жемчужина Востока", Москва куоракка ыытыллыбыт "Любимый город" Аан дойдутааҕы фестиваллар лауреаттара, Гран-При кыайыылаахтара "Илгэ" ансаамбыл кыттааччыларын ылбаҕай ырыалара-тойуктара сүргэбитин көтөхтө. Таланнаах ыччаппыт Илья Степанов ыллаан-туойан дьоро киэһэни киэргэттэ. Кэнсиэртэн киирбит үп "XXI үйэ. Саха сирин нэһилиэктэрэ: культура кииннэрэ" энциклопедияҕа үйэтитэр суруйуу тахсарыгар ананна. Маны сэргэ Хоноҕор олохтоох библиотеката туруорбут ансаамбыл историятын кэпсиир, нэһилиэк айар куттаах дьоно-сэргэтэ суруйан таһаарбыт айымньыларын көрдөрөр, Ийэ сылыгар аналлаах быыстапка мустубут дьон болҕомтотун ылла".

                                                                                                                                        Хоноҕордооҕу "Түһүлгэ"СК.  Муус устар 16 күнэ, 2022 с.

Муус устар 15 күнүгэр нэһилиэкпитигэр Суотту орто оскуолатыгар Саха АССР төрүттэммитэ өрөгөйдөөх 100 сылын көрсө бэчээттэнэн тахсыбыт саха бастакы интеллигенциятын төрүттээччилэр, өрөспүүбүлүкэбит сударыстыбаннаһа олохтоноругар олук уурбут тумус туттар дьоммут Софрон Сыранов, Алексей Аржаков-Сэһэн Ардьакыап уонна Илья Шадрин олохторун, сүдү үлэлэрин сырдатар история чахчыларыгар, архыып матырыйаалларыгар олоҕуран сырдатар СӨ "Ил Түмэн" судаарыстыбаннай мунньаҕын V ыҥырыытын бэрэссэдээтэлэ, норуот депутата, историческай наука кандидата А.Н. Жирков  бырайыагынан, салайыытынан күн сирин көрбүт "Предтеча" кинигэ сүрэхтэниитэ ыытылынна.

Муус устар 14 күнүгэр Хоноҕор сүрүн оскуолатыгар "Киһи - айылҕа оҕото" диэн библиотека фондатыттан үөрэнээччилэргэ анаан кинигэ быыстапката турда. Быыстапкаҕа тулалыыр эйгэ, экология, кыыл-сүөл, үөн-көйүүр, үүнээйи о.д.а. туһунан ийэ айылҕаҕа сыһыаннаах, ону сырдатар араас кинигэ ууруллан, оҕолор интириэһиргээн, умсугуйан аахтылар, көрдүлэр. Быыстапканы алын кылаас учуутала К.О. Гуляева оҥорон туруорда.

13 апреля в библиотеке проведена беседа для учащихся начальных классов Хоногорской основной школы, посвященная Дню Космонавтики и авиации. Сделан обзор тематической книжной выставки.