Ахсынньы 12 күнүгэр Хоноҕордооҕу "Түһүлгэ" СК "Айхаллан, Албан кыайыыламмыт Аҕа дойдум" Улуу Кыайыы 80 сылын көрсө биир дойдулаахпыт, талааннаах поэт С.С. Васильев-Борогонскай айымньыларынан уус-уран ааҕыы көрүүтүн түмүктүүр түһүмэҕэр Суотту, Бороҕон нэһилиэктэрин үөрэнээччилэрэ түмүстүлэр. Саха сиэринэн ыалдьыттары алгыстаах алаадьынан күндүлээн, бэлиэ тэрээһин оһуохайынан аһылынна. Оһуохайы таһаарда Суотту орто оскуолатын үөрэнээччитэ, кэрэ куоластаах ырыаһыт кыыс Инна Алексеева. Ааҕыы түһүмэҕин уус-уран салайааччы, СӨ культуратын туйгуна Валентина Сергеевна Бубякина иилээн-саҕалаан ыытта.
Уус-уран ааҕыы түһүлгэтигэр В.В. Алексеев аатынан Мүрүтээҕи "Уолан" гимназияттан, Суотту орто оскуолатыттан, С.С. Васильев-Борогонскай аатынан Хоноҕор сүрүн оскуолатыттан, В.М. Прокопьев аатынан Тумул орто оскуолатыттан, Уус Алданнааҕы техникумтан барыта 27 үөрэнээччи көхтөөхтүк кытынна. Бу күн оҕолор поэт үйэлээх хоһооннорун, "Ытык Ильмень" поэма-баллаадатыттан быһа тардыылары бэлэмнэнэн кэлэн аахтылар. "Васильевскай ааҕыылары" төрүттэспит, киэҥ эйгэҕэ таһаарбыт үтүө-мааны дьоммут «Хотугу сулус» оҕо телерадиоакадемиятын төрүттээбит, үгүс көлүөнэ талааннаах ыччаты таһаарбыт СӨ култууратын үтүөлээх үлэһитэ, «Гражданскай килбиэн» бэлиэ хаһаайына Татьяна Афанасьевна Гоголева, СӨ үөрэхтээһинин, социальнай сулууспа туйгуна Ольга Ильинична Тимофеева уонна Суотту модельнай олохтоох библиотекатын сэбиэдиссэйэ, CӨ культуратын туйгуна Раиса Николаевна Черкашина ааҕыылары көрөн-истэн, сыаналаатылар. Ааҕыылары тэрийбит "Түһүлгэ" СК сэбиэдиссэйигэр, СӨ муниципальнай сулууспа туйгунугар Екатерина Николаевна Гоголеваҕа, кыттыбыт бары оҕолорго, кинилэр салайааччыларыгар, уһуйааччыларыгар поэт Сергей Васильев өлбөт-сүппэт айымньыларын умсугуйан аахпыттарыгар махтанан, туоһу, махтал суруктары туттардылар, кэскиллээх сүбэ-ама биэрдилэр, үүнэр көлүөнэ ыччакка ис сүрэхтэн баҕа санааларын эттилэр.
Добун тэрээһиҥҥэ Суотту орто оскуолатын 4 кылааһын үөрэнээччилэрэ (сал. Татьяна Габышева) С. Васильев "Батастаан Баатыр" олоҥхотуттан быһа тардыыны - куукуланан дьүһүйүүнү көрдөрөн, тэрээһин кыттыылаахтара олус сэҥээрдилэр, кэрэхсээтилэр. Библиотека үлэһиттэрэ Осипова И.А. оҕолорго поэт олоҕун, айымньылаах үлэтин кэпсиир "Өлбөт өрөгөй ырыаһыта" быыстапканы сырдатан, бэсиэдэ оҥордо, Черкашина Р.Н. ыыппыт викторинатыгар оҕолор олус көхтөөхтүк кытыннылар.
Ааҕыы түһүлгэтин көҕүлээн тэрийбит ытык-мааны дьоммутугар, үүнэр көлүөнэ ыччаппытыгар махталбытын тиэрдэбит, баҕа санааҕыт сырдык сардаҥата сыдьаайа турохтун, киэн туттар биир дойдулаахпыт үтүө айымньылара үрдүккэ кынаттаатыннар!
