Муус устар 4 күнүгэр В.В. Никифоров - Күлүмнүүр аатынан "Тойон Мүрү" Култуура дыбарыаһыгар Саха АССР 100 сылын көрсө саҥа тахсыбыт, саха бастакы интеллигенциятын төрүттээччилэр, Өрөспүүбүлүкэбит судаарыстыбаннаһа үөскүүрүгэр олук уурбут сүдү дьоммут Софрон Сыранов, Алексей Аржаков - Сэһэн Ардьакыап уонна Илья Шадрин олохторун, общественнай үлэлэрин архыып матырыйаалларыгар олоҕуран сырдатар Саха Республикатын судаарыстыбаннай мунньаҕын Ил Түмэн ыҥырыытын бэрэссэдээтэлэ, дьокутаат А.Н. Жирков бырайыагынан, салайыытынан тахсыбыт "Предчета" кинигэ сүрэхтэниитэ ыытылынна.
Бу дьоһун тэрээһиҥҥэ кыттыыны ыллылар: А.Н. Жирков - СӨ Ил Түмэн судаарыстыбаннай мунньаҕын бэрэссэдээтэлин бастакы солбуйааччы; А.В. Федотов - Уус Алдан улууһун аҕа баһылыга; О.В. Иринеев - Хаҥалас улууһун аҕа баһылыга; Б.П. Протодьяконов - Хаҥалас улууһун сэбиэтин бэрэссэдээтэлэ, А.Р. Ноговицын - историк-краевед, А.Н. Харитонов - Ойуку - Саха норуодунай суруйааччыта, поэт, С.В. Максимова - СӨ национальнай библиотекатын директора, А.Н.Божедонова - общественнай деятель, И.П. Ущницкай - журналист, А.А. Добрянцев - СӨ Ил Түмэн бэһис ыҥырыылаах мунньаҕын бэрэссэдээтэлин солбуйааччы, А.А. Борисов - историческай наука доктора, П.П. Петров - историческай наука доктора, Б.Е. Дьячкова - кыраайы үөрэтээччи, З.И. Петухова - "Илин" сурунаал редактора, Г.Е. Шадрина - историк, кыраайы үөрэтээччи, Н.А. Барамыгин - СӨ бастакы Президенин М.Е. Николаев референэ, А.В. Румянцев - СӨ национальнай архивын директора
С.В. Попов - СӨ бастакы Президенин көмөлөһөөччүтэ, В.А. Егоров - СӨ "Үүнэр көлүөнэ" тус сыаллаах фондатын генеральнай директора.
"Биһиги бэйэбит тирэхпитин көрдүүбүт"-- диэн түмүк тылтан саҕалыым бүгүҥҥү үтүө тэрээһини. Ити Александр Николаевич Жирков "Предтеча" диэн саха бастыҥ өйдөөх дьонун, улахан "иччилээх" дьоммутун туох баар кырдьыгынан уонна толору архыып матырыйаалларыгар олоҕуран туран бэлэмнээн таһаарар кинигэлэрин тиһигин сүрэхтэниитигэр эппит тыла. Софрон Сыранов, Сэһэн Ардьакыап уонна Илья Шадрин. Саха интеллигенциятын бастыҥ дьоно. "Эстэр омук бэйэтин өбүгэтигэр итэҕэстэри көрдүүр, оттон күүстээх омук бэйэтин төрдүлэрин үөрэтэр, историятын ыччатыгар тириэрдэр" - эмиэ Александр Николаевич этиитэ. Бүгүн Уус Алдан дьоно-сэргэтэ уһугунна, сэргэхсийдэ, түмүстэ, сааһыланна уонна духуобунайдык байда. В.В. Никифоров - Күлүмнүүр аатынан култуура lыбарыаһыгар: Хаҥаластан, Намтан уонна Дьокуускай куораттан историяны, кыраайы үөрэтээччилэр, Илья Шадрин сыдьааннара, саха норуодунай суруйааччыта П.Н. Харитонов - Ойуку кэлэн ыалдьыттаан, бу "Предтеча" кинигэ сүрэхтэниитигэр кыттыыны ыллылар. Уус Алданнар, Лөгөй Тойон, Сэһэн Ардьакыап, Күлүмнүүр курдук дьон сыдьааннаара, бу тэрээһини дьоһуннук, истиҥник салайан ыыттылар. Улууспут баһылыга А.В. Федотов бэйэтинэн салайан, тыл этэн, тыл биэрэн ыыппыта да улаханы этэр. Историяны олохтоохтук үөрэтэр, дириҥник хасыһар учуонайдар Андриан Борисов, Зоя Петухова олус ис хоһоонноох анаарыыларын, үлэлэрин иһиттибит. Саамай үөрүүлээҕэ диэн улуус нэһилиэктэрин бары баһылыктара, историяны, кыраайы үөрэтээччилэр, история учууталлара, үөрэнээччилэр бааллар, үксэ эр дьон кэчигирэһэн. Тутан олорон көрөргө астык! Уус Алдан улууһун кииннэммит музейын дириэктэрэ, салайааччыта Дь.М. Заболоцкай, Киин библиотека тэрийиилэринэн турбут хас да история быыстапкатын норуот сэҥээриэн сэҥээрдэ, астына көрдө. Восковай оҥоһуктар: Лөгөй Тойон уонна кини кэргэнэ , Сэһэн Ардьакыап Екатерина Ыраахтааҕылыын көрсүһүүтэ - ураты туруоруунан буоллулар. Саха театрын артыыстара, маладьыастар, бу үс киһи уобараһын толору арыйан, оччотооҕу идеологияны бу баардыы ууран көрдөрдүлэр. Браво, бис! Бу күн улууспут баһылыга Алексей Васильевич биир дойдулаахпытыгар Зоя Ильиничнаҕа "Уус Алдан улууһун Бочуоттаах олохтооҕо" ааты иҥэрдэ, туттарда. Саамай сөп! Эҕэрдэлиибит, Зоя Ильиничнаны! Оттон мин махтанабын, СӨ Национальнай архыыбын дириэктэригэр Петр Васильевичка, Нам улууһун 2-с Хомустааҕын баһылыгар Лев Николаевичка уонна талааннаах, биллиилээх режиссерга - операторга, киинэ устааччыга Александр Лукиҥҥа биир массыынанан айаннаан, сэһэн-кэпсэл буолбуппутугар! Тыл этээччи олус элбэх, бары олус дьоһун дьоннор: историяны уонна кыраайы үөрэтээччилэр".
Татьяна Жиркова, Н.Е. Мординов - Амма Аччыгыйа аатынан "Кэскил" оҕо бэчээтин кыһатын редактора, суруналыыс.
