Бүгүн, ыам ыйын 28 күнүгэр, олохтоох библиотекаҕа СР Ийэ дойдуну көмүскээччи сылыгар аналлаах VII-с ситимнээх өрөспүүбүлүкэтээҕи "Кинигэ күүһэ-2025" акцияҕа кыттыы чэрчитинэн Хоноҕор сүрүн оскуолатын алын уонна орто сүһүөх кылаастарын үөрэнээччилэригэр ааҕыы тэрээһиннэрэ ыытылыннылар. Ол курдук, алын кылаас оҕолоругар "Чуораанчык" сурунаалтан хорсун быһыыны көрдөрбүт Герой-пионер Сима Сергеев уонна кырачаан саллаат Серёжа Алешков тустарынан тэттик кэпсээннэри ааҕан иһитиннэрии, аахпыты ырытыһыы, ол кэннэ булугас өй оонньуулара, оҕолорго аналлаах саҥа кэлбит кинигэлэри билиһиннэрии буолла. Орто сүһүөх кылаас үөрэнээччилэригэр "Дьоруой уолаттарбыт" кинигэттэн Россия Геройа Алексей Неустроев оҕо сааһын, хорсун быһыытын туһунан ааҕыы, ырытыһыы буолла. Ол кэнниттэн оскуола учуутала, СР үөрэҕириитин туйгуна М.В. Бурцева "Сырдык хоруона" диэн ийэтэ - сэрии кэмин оҕото, норуот талааннааҕа, чабырҕахсыт Е.К. Местникова оҕо сылдьан истибит остуоруйатын кэпсээбитин оҕолор олус сэҥээрэн иһиттилэр. Түмүккэ уопсай өйдөбүнньүк хаартыскаларга түстүбүт.