Муус устар 18 күнүгэр Суоттубут нэһилиэгэр Саха АССР төрүттэммитэ өрөгөйдөөх 100 сылынан Саха Өрөспүүбүлүкэтин күнүн көрсө ыытыллар декада арылынна. Декада дьаһалта баһылыгын планеркатыттан уратытык саҕаланна. Бу бэлиэ күҥҥэ Суотту нэһилиэгин тэрилтэлэрин салайааччылара, олохтоох Сэбиэт депутаттара сахалыы таҥастаах кыттыыны ыллылар.
Үөрүүлээх тэрээһиҥҥэ С.С. Васильев-Борогонскай хоһооннорун дорҕоонноохтук ааҕыы ыытылынна, Суотту модельнай библиотекатын сэбиэдиссэйэ Р.Н. Черкашина "Саха сирэ сайдыы суолунан" кинигэ быыстапкатын билиһиннэрдэ, сэбиэскэй государственнай уонна партийнай деятель, Саха Автономиятын төрүттэспит саха норуотун чаҕылхай уола М.К.Аммосов олоҕун, үлэтин тула олус интириэһинэй иһитиннэрии оҥордо. Нэһилиэк баһылыгын солбуйааччы С.И. Ксенофонтов Суотту нэһилиэгин саҥардыллыбыт геральдикатын билиһиннэрдэ. Планерка сүрүн чааһыгар Суотту нэһилиэгин баһылыга В.И. Иванов, нэһилиэк депутаттарын Сэбиэтин бэрэссэдээтэлэ В.Д. Заровняев, тэрилтэ салайааччылара эҕэрдэ тыл этэн, иһитиннэрии оҥордулар. Түмүккэ үйэлээх уопсай хаартыскаҕа түһүү буолла.