Муус устар 15 күнүгэр нэһилиэкпитигэр Суотту орто оскуолатыгар Саха АССР төрүттэммитэ өрөгөйдөөх 100 сылын көрсө бэчээттэнэн тахсыбыт саха бастакы интеллигенциятын төрүттээччилэр, өрөспүүбүлүкэбит сударыстыбаннаһа олохтоноругар олук уурбут тумус туттар дьоммут Софрон Сыранов, Алексей Аржаков-Сэһэн Ардьакыап уонна Илья Шадрин олохторун, сүдү үлэлэрин сырдатар история чахчыларыгар, архыып матырыйаалларыгар олоҕуран сырдатар СӨ "Ил Түмэн" судаарыстыбаннай мунньаҕын V ыҥырыытын бэрэссэдээтэлэ, норуот депутата, историческай наука кандидата А.Н. Жирков  бырайыагынан, салайыытынан күн сирин көрбүт "Предтеча" кинигэ сүрэхтэниитэ ыытылынна.

Бу дьоһун тэрээһиҥҥэ кыттыыны ыллылар ытык-мааны ыалдьыттарбыт - тумус туттар биир дойдулаахпыт А.Н. Жирков, кинигэҕэ үлэлэспит кыраайы үөрэтээччи, историк, биир дойдулаахпыт З.И. Петухова, историческай наука доктора, СӨ культуратын туйгуна П.П. Петров уонна нэһилиэкпит олохтоохторо, тэрилтэ үлэһиттэрэ, оскуола үөрэнээччилэрэ. Бэлиэ кинигэ сүрэхтэниитин иилээн-саҕалаан ыытта Суотту орто оскуолатын иһинэн үлэлиир музей салайааччыта И.Р. Ядрихинская. Суотту модельнай библиотекатын сэбиэдиссэйэ Р.Н. Черкашина кинигэ ис тутулун сиһилии, толору ырытта. Суотту нэһилиэгин баһылыга В.И. Иванов, оскуола директора И.М. Петухова, кэлбит ыалдьыттар эҕэрдэ тылларын, санааларын эттилэр, кинигэ тула олус истиҥ, ис хоһоонноох кэпсэтии, сэһэргэһии ыытылынна. Олохтоох ааптар, Суотту нэһилиэгин бочуоттаах олохтооҕо Г.Г. Портнягин эҕэрдэлээн, 2021 с. бэчээттэнэн тахсыбыт "Оҕо тылдьыта" кинигэтин Александр Николаевичка бэлэх уунна. Маны сэргэ бу бэлиэ күҥҥэ Суоттутааҕы "Доҕордоһуу" музей, С.С. Васильев-Борогонскай аатын сүгэр Хоноҕор сүрүн оскуолата, нэһилиэк библиотекардара бэлэмнээн туруорбут анал быыстапкалара дьон болҕомтотун, сэҥээриитин ылла. Быыстапкаларга өрөспүүбүлүкэ, улуус, нэһилиэк историята, биллиилээх, бас-көс дьоно сырдатылыннылар.