Кулун тутар 4 күнүгэр  Хоноҕордооҕу "Түһүлгэ" СК, Cуоттутааҕы “Мичээр” СК тэрийиилэринэн нэһилиэккэ үбүлүөйдээх бэлиэ сыл аһыллыыта ыытылынна. Тэрээһин быыстапкаттан саҕаланан мустубут дьоҥҥо сырдатылынна. Быйылгы сылга нэһилиэк үбүлүөйдээх тэрилтэлэрэ - С. Васильев-Борогонскай аатынан Хоноҕордооҕу сүрүн оскуола, Уус Алдан техникума, Хоноҕордооҕу “Түһүлгэ” СК коллективтара историяларын кэпсиир быыстапкаларын туруордулар, олохтоох библиотекалар  "Лена" совхоз тэриллибитэ 55 сылыгар, С.С. Васильев-Борогонскай төрөөбүтэ 115 сылыгар аналлаах быыстапкаларын туруоран сырдаттылар.

"Мичээр" СК уус-уран салайааччыта Устинья Борисова суруйуутуттан: "Бэлиэ тэрээһин Автономия 100 сылыгар анаан Суотту орто оскуолатын үөрэнээччилэринэн туруоруллубут литературнай монтаһынан, Саха республикатын гимнын көрөөччүлэрдиин сүһүөхтэригэр туран патриотизм сырдык тыынынан саҕаланна. Салгыы Суотту нэһилиэгин депутаттарын Сэбиэтин 2021 с. 96-7 №-дээх ахсынньы 21 күнүнээҕи быһаарыытынан Суотту нэһилиэгин анал бэлиэтэ бигэргэммитин туһунан сырдатылынна, олохтоох автор, мелодист Георгий Говоров суруйуутугар Филипп Габышев оранжировкатыгар  “Суотту вальса” ырыаны  2018 сыллаахха “Эн сулускун” республиканскай ырыа проегын кыттыылааҕа, улуус, республика конкурстарын лауреата Лена Заровняева ыллаан көрөөччүнү долгутта, уйадытта. Бу киэһэ өрүү инники сылдьар, көхтөөх, кырдьары билиммэт эдэрдии эрчимнээх, төрүт культуурабытын, сиэрбитин-туоммутун тарҕата сылдьар “Илгэ” фольклорнай ансаамбыл  “Ыҥырыы кэлэрин тухары...” диэн ырыаларын ыллаан “Бис!”, “Браво!” ытыс тыаһынан эҕэрдэни туттулар. “Илгэ” ансаамбылы төрүттэспит, уостан түспэт кэрэ ырыалары айбыт ытык кырдьаҕаспыт Мария Федорова Ийэ сылыгар, кыыс оҕоҕо анаан бэйэтэ айбыт ырыатынан эҕэрдэлээтэ. Бүгүн манна олохтоох автор, мелодист Анастасия Степанова айбыт икки сабыс саҥа ырыалара сүрэхтэннэ. Саханы аан дойдуга аатырдыбыт убайдыы-быраат Көстөкүүнэптэр, Суотту 21  спордун маастардарын кэккэ инники күөҥҥэ сылдьар ыччаттарбытыгар анаан “Эр бэрдэ” ырыаны толордулар автордар - Иннокентий Портнягин, Филипп Габышев. Суотту нэһилиэгин автордарын бииртэн биир кэрэ ырыалара ылланна. Үлэлэриттэн, күннээҕи түбүктэн быыс булан кыттар уус-уран самодеятельность кыттыылаахтарыгар, үҥкүүһүт ыччаттарбытыгар, ырыаһыт далбардарбытыгар, бука барыгытыгар махтанабыт! Тыа сирин олоҕун сэргэхситэр, дьону-сэргэни сомоҕолуур элбэх тэрээһиннэри тэрийиэҕин, оҥоруоҕун! Дьоллоох, доруобай сылдьын!".